La doumeisélo Pulchérie vio un chi, ô chino, sabe io, que n'éro gaire pus gros qu'un lapin. La lu pelavo "Zouzou, moun pitit Zouzou, lu Zouzettou de sa mama...".
     Queü chirou frisa éro billa en d'un paletot, coum'un pitit moussur, et, quoiqu'ô siet orre, chuquant et gliereü, ô v'éro presa dins la meijou. O sabio bè, lu pitit bougre, que sous meitreis éran nobleis. Ossi, ô se cresio tant que is, mai beleü mai. N'y vio pas dangié qu'ô frequante sous pariés, qu'is sian de chasso ô de bargié. Jamais ô lur fesio de politessas et lous sinavo point darei et davant, couma fan lous autreis chis quand is se disen bounjour.

Lu pitit chi éro si bourru par lous dous bouts que foulio visâ un boun mament par sachei dô biai qu'ô minjavo. Mai d'un cop, Picatau se vio troumpa et li vio presenta dô sucret dô coûta de la couo.       (Avec la voix de Yvon Rouyer -Varaignes-)

     Queü meitié li plasio point, mai Zouzou, étou se, n'eimavo gaire tous quis soins. Chaque cop, foulio l'accoursâ. Jean ne cujavo pas lu trapâ et, quand ô lu tenio, lu chi ranavo et fesio la coumedio.
     Un jour que Picatau se faguet mordre, ô juret qu'ô se deibarrasserio de queü pitit foutrassou.
     Veiqui coum'ô faguet : ô prenguet sur la chaminéio no baboyo roujo que tenio no grando fourcho. Qu'éro un diablatou que v'ôrio fai fremî taloment qu'ô v'éro orre, avéque sa figuro que grissavo, sas douas banas et sa lounjo couo. Tous lous jours, Picatau l'engreissavo de miau et Zouzou prenio grand plasei à lechâ la baboyo. Queü pitit lechou s'enquiétavo point si qu'éro un diable ô b'étou n'ange.
     La senmano d'après, Jean li presentet tous lous jours un chapelet. Par pris qu'ô lu li mettio sous lu nas, ô Ii foutio un cop de varjo. O bout de quauque temps, lu chi éro si bè dressa qu'ô n'attendio pus d'être eibroudicha. De tant loin qu'ô vesio lu chapelet, ô fugio en janliant et ne visavo mémo pas si Picatau tenio no brocho.
     Après queü dressage, Jean tôpet la fillo dô coumte.
     " Doumeisélo, s'isset-eü, vous l'eimas bien votre pitit chi?
     - Creset bè, qu'i l'aime! o v'ei si mignard et si adret, moun pitit Zouzou...
     - Eh bè! si v'éras miei ransegnado, vous l'eimerias pas tant. Couma ? Vous ne vesez pas que ca n'ei pas de chi? Cresez-me, qu'ei un diable que fai lu flôgnard par vous miei aviblâ. Si vous lu gardas, ô vous menaro tout dret dins l'anfar.
     - Oh ! que diseis-tu ? Tu te mouquas de me ?
     - Nei gro, doumeisélo. Vau vous prouvâ qu'i diset la verita."
     Picatau anet quére lu diable rouge. Sitôt qu'ô l'aguet pôsa sur lu plancha, lu chi se mettet de lu caressâ et lu lechâ. Mas tout d'un cop, moun ami, Jean surtit lu chapelet. Ah! si vous lu vias vu, lu chirou ! Vous proumettet qu'ô la leisset, la baboyo. O partit en s'eijangouliant et faguet mai de diès cops lu tour de la chambro. Orias dit qu'ô v'éro trafouli.
     Ah! n'y aguet pas besoin de fâ d'autre boniment à la doumeisélo Pulchérie. La l'eimavo bè, lu pitit Zouzou, mas poudio-t-ello lu gardâ après ço que la vio vu ?
     Cop set, la disset à soun pai que la ne voulio pus soun chi.
     Dei l'endemo, lu coumte l'empourtet, et, quand ô tournet, degu li damandet s'ô lu vio toua, vendu ô douna.