Vau vous countâ couma no bétio farucho mettet la revouluceü dins lu châteü dô Grand Loubard.
     V'ai deija dit que la doumeisélo Pulchérie eimavo bien soun chi, mas la ne poudio pas suffrî l'ôtras bétias. La vio pô dôs chavaus mai de las vachas et cujavo se troubâ mau quante la vesio no sar, un grapaud ô un pitit rat de tiretto. Lous badôs, lous barboutis et las farmis n'éran point sous amis, étou is.
     Figuras-vous qu'un mati, la doumeisélo sentit belinâ dins soun parpai. Ossitôt, la credet couma si l'éro pardudo.
     Soun pai venguet à soun secours, mas coum'ô v'éro loin, Picatau fuguet pus tôt riba que se. " Que y o co doun ? se disset-eü.
     - Aido-me, seü plas, dit la fillo. Y ai n'eigrinjolo dins la peitreno.
     - Ne pureis pas, doumeisélo. Nous l'ôram, l'eigrinjolo, quante lu diable y sirio."
     Nous l'oram ? ... qu'éro eisa dire. Mas couma s'y prenei? Si ca vio eita la cousiniéro, ô b'étou la fillo de chambro, Picatau orio mettu la mo sur lurs tettous, par lur randre sarvice. Soulament, avéque la doumeisélo, foulio pas y pensâ. Par fouringâ dins lu parpai d'uno fillo de coumte, fourio vei dô tupet.
     Jean Picatau ne vio pas la této chômenido. Ca li venguet no boun' idéio. Sei dire garo, ô trapet la Pulchérie par las chambas, et, coum'ô v'éro bounefant, ô la tenguet pingouliado, la této en bas, en la secouden coum'un prunié. Bien entendu, lous coutillous de la fillo crubian sa figuro.
     "Picatau! que fas-tu ? credet-ello. Tu veseis bè qu'i n'ai pas mous pantalous?
     - Qu'y fai co, doumeisélo ? Vous n'ôreis pas lu temps de v'enrhumâ."
     En eiffet, la bétio toumbet cop set. La fameüso eigrinjolo que vio tant fai credâ la fillo n'éro qu'un pitit sôtareü.
     Pendent que Picatau tenio la doumeisélo par las chavillas, moussur de Charaban entret. Quand ô veguet queü tableü, vous garantisset qu'ô faguet brave.
     Sa fillo aguet beü li arpliquâ ço que se vio passa, ô ne vouguet pas l' eicoutâ. O tratet soun vale de tous noums et li foutet no giflo.
     "Trapo co, moun paubre Jean, dit Picatau en se frettant la jauto.
     - Tu marounas, eisolent ? disset moussur de Charaban.

- Ovas, moussur lu Coumte, s'i marounet ca n'ei pas sei rasou. Sabe qu'i v'ai fai degreü, mas ne sai pas countent, étou me. Quand votro doumeisélo o creda, me sai deiandillouna par venî à soun secours. Par li eidâ, m'y sai prengu ôssi poliment qu'i ai pougu. I ai tout fai par lu bien, et, couma recoumpenso, i ai trapa un jôta. Ca me sarviro de leiçou. N'autre viage, si ca torno ribâ, vous proumetet qu'i lous magnarai, lous tettous de la doumeisélo..."       (Avec la voix de Yvon Rouyer -Varaignes-)