LU TRAMVOUÉ DE SENT-BARRANCOU
        Lous eiletours de Sent-Barrancou mai lous de las communas vesinas vian bailla no forto majorita ô deputa. Par lous recoumpensâ, ô lur faguet vei lu tramvoué.
        Ah ! ca n'éro pas un gros tren, de lous que fan tant de flacard, tant d'embarras, mai lurs grandas garas, lurs pounts et lurs tunnels. Qu'éro noumas un tout pitit tramvoué sei gliereüseta, que semblavo no batteuso, un boun drôle de tramvoué, bien coum' ô fô, que navo bravoment de pô de deirayâ, et que pipavo tranquillament, coum'un bourgeis qu'a bien dîna.
      (Avec la voix de Yvon Rouyer -Varaignes-)
        Queü d'aqui, li foulio pas de gardo-barriéro. O segio la routo ô lio de la coupâ et se mettio bien sur lu bord par ne pas geinâ las charrettas. Mas, coum' ô cragno la pouvero, sitôt qu'ô poudio, ô sôtavo dins lous champs et dins lous boueis.
        Lu tramvoué de Sent-Barrancou ne vio pas bouno piro couma lous gros trens que s'en van à Paris. Lu paubre pitit bougre n'éro gaire santable. En touto sasou, ô pouchavo coum'un chat enrhuma.
        Quand ô mountavo lous tarmeis, n'un l'ôrio segu à pied. O fesio mai qu'ô ne poudio et ca fesio pita de l'ôvî gemâ. Partant, lu courage li manquavo pas. La couléro lu fesio ranâ et ô se crampounavo sur las rayas en eipouffidant couma s'ô vio sina dô pebret. Soulament, bouna gent, la forço n'y éro pas et foulio qu'ô se réte par buffâ ô mitan de la côto.
        Mas qu'and ô v'éro sur lu tuquet, moun ami, fô veire s'ô se rebiffavo! Quoique pitit., ô vio boun soueirau et ô n'ayavo treis ô quatre eicouéladas que v'ôriam fai fremî.
        Couma lu chabretaire de la chansou, lu tramvoué de Sent-Barrancou sôtavo las charraus. Qu'éro par nâ dire bounjour à la gent que pichavan ô bladavan. En passant, ô visavo si las poumpiras vian frouja et si las cireijas éran maduras, mas, coum'ô ne poudio pas mountâ sur lous cirieis par vengeta ô eipoutissio lous regotis.
        De las téras ô filavo dins lous bos. Lous vouiajours -si n'y vio- davalavan par charchâ lous champagnôs et, couma lu tren éro boun garçou, ô lur attendio.
        Après, ô eipingavo coum'un lebraut dins lous brujauds et lous desarts et, quand ô s'einouyavo dins las landas, ô coulavo dins lous founds, histoiro de prenei lu freichet dins lous pras.
        Lous Sents-Barrancous éran fiars de lur tramvoué et l'ôrian pas douna boun marcha, mas toutas las bétias que viven dins lous boueis, lous fourgouniés ô sur lu bord de l'aigo n'en vian no pô negro.
        Quand ô ribavo en ranant, las jassas s'y fiavan pas, las se sôvavan en jagassant; lous lapins venian fôs et se cougnavan vite dins lur cros; lous greüs que chantavan sur lous suchaus se rétavan cop set; las galiôdas cresian que qu'éro la fi dô mounde et sôtavan uno après l'autro dins lous reüs.
        Lu tramvoué de Sent-Barrancou éro bien utile par menâ lous beitiaus, lu boueis de brasso, lu boueis pela, mai tout espéço de marchandio. De mai, lous jours de feiro, mai dôs viageis lous autreis jours, ô menavo quauqueis vouiajours. Mas, ent'ô randio tant de sarvicet, qu'éro par baillâ l'houro dins lu paÏs. Queü pitit tren, qu'éro la pendulo de la communo.
        Qu'ei vrai qu'ô n'éro point trop regulié. Dôs viageis, ô vio plo demio-houro ô n'houro de retard. Mas ca ne vio pas beücop d'empourtanço. Lous Sents-Barrancous n'éran pas "viso de près". Quoiqu'ô variet souvent, is vian counfianço en se.
        Quand ô ribavo en eitiflant, n'un lous vesio eissamâ de tous lous biais. "Vei lu tramvoué!" disian-t-is, et tous courian à lur trabai ô b'étou à la soupo.
        Lu tren lur disio que qu'éro lu mament de fâ tettâ lous vedeüs ô lous meinajous, de nâ bladâ ô de touchâ l'oveillas. Dei la prumiéro eitiflado, lous gouiats partian par l'eicolo et las fennas mettian lu dinâ ô fio, autroment las fesian la bacado par lous porcs.
        Queü pitit tramvoué éro lu vré meitre de la communo. Lu quite méro li ôbaïssio. La gent ne poudian pus se passâ de se et n'un se damandavo coum 'is fesian quand ô n'eizirtavo pas.
        Un mati, tout parié, ô manquet à soun devei. Queü viage, ô vio un vouiajour passablament foutrassou. N'am deija parla de se. Qu'éro queü meichant Pebrettou, que, couma vous sabez, éro vale à Paris.
        Queü Parisien d' occaseü se mouquet tout lu temps dô tramvoué. Tantôt ô disio : "il est rien moch' le p'tit tacot"ô b'étou : "C'est pas un train, c'est une brouette", mai d'ôtras parôlas dins lu mémo janre.
        Quellas meichancetas chuquéren lu chôffour mai lu tren. Tous dous s'eimaliren; après, ne sabian pus ço qu'is fesian.
        Lu tramvoué s'emballet et partit ô galop. O navo si vite qu'ô tuet no poulo, eichambet n'ôveillo et coupet la couo d'un chi. Après, ô deirayet et s'en anet dins t'uno téro ent'ô eipoutit n'homme. Qu'ei vrai que qu'éro n'homme de pailla en retréto, mas, si ca vio eita un vré chrétien, ô l'eibrigaliavo si bè que l'autre.
        Queü jour de malur, lu tren ôbludet d'eitiflâ et ne dounet pas l'houro. Ca mettet lu desordre dins la communo.
        Lous drôleis manquéren l'eicolo et la doumeisélo dô châteü se levet à mieijour; lous vedeüs mai lous nurijous ne tettéren pas; lous porcs n'aguéren pas de bacado et no troyo que crevavo de fam minget sous gourillous; las moungetas de la mareichaudo ne fuguéren pas cuéchas, soun homme la bourret et la lu quittet.
        Que de treblu et que d'einueis par la fauto d'un meichant Parisien de Sent-Barrancou que ne vio pas pougu tenei sa lingo !
vers le début de la page
Page d'accueil Glossaire
Table des histoires Histoire suivante