| Lous
counseliés de Sent-Barrancou n'éran point fats. Soulament, par bien dire
la verita, n'éran gaire forts en politiquo. Qu'ei tout jurte s'is sabian
que la Franço éro en Republiquo, et, dins tout lu counsei, n'y vio que lu
méro et lu Lapin que couneissian lu noum dô President. Vous dirai mémo que
lu pus anciens de is, lu viei Crama, cresio que n'éram gouvarnas par quello
crâno fenno que n'un pélo Marianno. Touto quello bravo gent s'enquiétavan point dôs partis qu'eizistavan. Ossi, lu Sous-Prefet pardio bien soun temps quand ô damandet ô méro l'eitiquetto politiquo de chaque counselié.
- Que diable lu Sous-Prefet vô-t-eü fâ de quell' eitiquettas ? disset lu pitit Boubou. Qu'ei plo par amusâ sous gouiats? - Nei gro, reipoundet lu méro, ô n'o pas de famillo. Auvo, qu'ei no bétio que t'ô dit, mas creirio pus tôt qu'ô vô tenei boutiquo et ô se deibraulio par troubâ deçai delai tout ço que li fai besoin. Soulament, ô s'ei troumpa de porto. Vau reipounei à queü moussur que lous counseliés de Sent-Barrancou ne fan pas de coumarce. Ca n'ei pas chas nous que fô tutâ pas vei de l'eitiquettas." Quand lu Sous-Prefet reçobet la lettro dô méro, ô risset à ventre deiboutouna. "V'as mau coumprengu, reipoundet-eü. Ca s'agî pas dô tout d'eitiquettas par la marchandio. Ço qu'i vous damande, qu'ei l'opinioun politiquo dôs counseliés. Fô me dire s'is soun republiquens ô royalirteis, s'is soun socialirteis, radicaus ô b' étou clericaus." "Ah! bien, s'isset lu méro. Y sai quete cop." Ca fai que, ô tournet assemblâ soun counsei. Quand ô aguet legi la lettro dô Sous-Prefet, lu gros Minaud, lu pus malent de la troupo, disset d'un ar tout eibuffa : "Mous amis, i ai beleü la lingo trop lounjo, mas pode pas m'empeichâ de dire que queü moussur se mailo de ço que li regardo pas. Que po co li fô que nous siam republiquens ô raceünaris? - T'eimalis pas, Minaud, disset lu méro. Tu sabeis bè que lu Sous-Prefet ei notre patrou ? Eh bè fô que nous li obaïssam. Chacun de vautreis vai doun me dire soun opinioun. Nous vam coumença par tu. Vesam veire, couma te marquet io ? Tu sés plo radicau?" Lu Minaud ne vio jamai ôvi parla de radicaus et ô prenguet quello paraulo par n'ensurto. O venguet tout rouget et foutet sur la tablo soun grand chapeü negret, "Radicau! disset-eü. Vous me tratas de radicau? Apprenez, moussur lu méro, qu'i ne sai pas pu radicau que vous! Sai raço de bravo gent, Deü marce. N'ai jamais fai de tort à degu..." Lu méro s'einouiet tout à fet par li fâ coumprenei la rasou. A la fi, tout parié, ô l'apasimet et lu préjet, bien poliment, de dire soun opinioun. "Et vous, moussur lu Méro, reipoundet l'autre, coum'ei-t-ello, votr' opinioun, s'i ne sai pas trop quereü? - Oh! me, s'isset Drissou, sai toujours par lu gouvarnament qu'eizirto. - Mas s'ô chanjo ? - S'ô chanjo me deiviret. - Eh bè, m'ai m'étou, fau couma vous. Sai toujours dô biai dô manche. - Qu'ei bien, se dit lu méro, zu marquarai sur ma reipounso. " Après, ô se viret dô biai de Bridane. "Et tu, qu'ô li disset, de quau bord sés-tu ? - Me ? reipoundet Bridane. I souténe par lu po qu'i minje. Quand i trabaille chas lu coumte de Charaban, sai royalirte. Autroment, lous autreis jours, sa mai que mai republiquen. - Et tu, Tripou? damandet lu viei Drissou. - Moussur lu Méro, s'isset-eü, marquas qu'i sai republiquen pur sang. De tous temps i ai dit: "Vivo lous peillauds! A bas lous gros!" Lu Redound ne fuguet pas si nâtre. O marmuset d'un ar bounasse : "Par me, ne sai pas countragnous. Sai toujours de l'avis dôs autreis. - Tu sés doun de moun avis, disset Leibana. Me, sai par lu boun ordre. Ne damande que la jurtiço et un boun coumarce. - Eh bè, mai me ", dit lu Redound. Quante ca fuguet lu tour dô Lapin, ô arpliquet qu'ô v'éro partisan que lous cureis se maridan. "N'an-t-is pas de que nurri de la famillo ?" disset-eü. Pendent que lous autreis parlavan, l'ajoint, lu grand Balaran, se vio endurmi sur sa chieiro. Lu méro lu pigougnet. "Que y o co ? que y o co ? disset-eü en s'eiveliant. - Eh bè, Balaran, se dit lu méro, dijo-nous étou tu ta feiçou de pensado. Coum'ei toun opinioun? - Euh! sabe io... Pode pas vous reipounei d'ahuei. - Parque doun ? - Qu'ei que, tout ôre, ma fenno ei à Thiviers. - Qu'y fai co ? dit lu méro. Nous n'am pas besoin d'eilo. - Siei bè, jurtament. Qu'ei que, vous coumprenez, quand i fau quauquo ret, damandet toujours soun avis. L'einouious, qu'ei que la chanjo souvent d'idéio." Lu méro risset. Après, ô se viret dô biai dô viei Crama et dô pitit Boubou que sibavan dins lur coin et ne drubian pas lu bet. "Et vautreis, qu'ô lur disset, fô co vous mettre radicaus, suçolitreis, autroment curettiés? - Ne marqueis ret dô tout, disset Crama. Me, n'ai pas d'opinioun. Me foutet de la poul' eicouado. - Mai m'étou", se dit Boubou. Quand lu paubre méro aguet tous qui ransegnaments, ô fuguet si avança après qu'avant. O ne sabio que mettre sur sa reipounso. Veiqui coum'ô faguet : couma, dins queü mament, lous radicaus tenian la couo de la pélo, ô creguet bien fâ de dire que lous counseliés éran tous radicaus. De vio-t-eü bien carcula, lu méro de Sent-Barrancou ! Lu Sous-Prefet fuguet si countent de se qu'ô lu faguet decorâ de la pourado. |
||||
| vers le début de la page | ||||
|