| Avant
que Picatau parte de Sent-Barrancou, lu méro li vio dit: "Peique tu vas veire lous Parisiens, voueis-tu, seü plas, me fâ no coumisseü ? - Avéque plasei, moussur lu méro. Que fouro co qu'i fase ? - Eh hé, sirio countent que tu diseis bounjour de ma part à Moussur Falliéro. - Ah! Luqua v'ei co queü moussur Saliéro ? - Qu'ei lu que gouvarno la Franço. O v'ei President de la Republiquo. - Fils de la mai! Jamais n' osarai li parlâ. Queü moussur n'ei pas dô tout fiar, d'après ço que n'un dit. O v'ei préque si peisant que nautreis. Tu ne sabeis pas qu'ô vet d'Agen? Parei qu'ô coumprend lu patois mai qu'ô lu parlo. - Eh bè, si qu'ei entau, ca vai. Farai votro coumisseü. " Picatau tenguet paraulo. Tant qu'ô v'éro à Paris, ô s'eimaget ente demouravo moussur Falliéro et quaucu li ensegnet un' espéço de châteü que se pelavo "Elysée". Quello bravo demouranço éro entourado de grands murs. "Veiqui n'emplaçament que n'eirio bien par eilevâ de la voulaillo, disset Picatau. Las poulas ne ruquerian pas nâ chas lous vesis." Jean se damandet coum' ô ferio par veire lu President. O ribet davant un grand pourtau de far et s'adresset à d'un espéço de soudard ô gendarmo qu'éro dins t'un pitit cabanon. O cresio qu'is lu menerian cop set chas moussur Falliéro. Mas ca fuguet tout un affas. Vous countarai pas en detai couma ca se passet. Countentas-vous de sabei qu'à la fi, après bien dôs einueis, Jean russit tout parié à se fâ counduî ô bureü dô President. "Tenam nous bien, penset-eü, et siam polis." "Vous souate bien lu bounjour, moussur lu gouvarnament, disset-eü en entrant. Vous damande pas couma vai la santa: vése que vous ne sés pas tant magrissou. Et votre bourgeiso, madamo la Republiquo, couma vait-ello?" Dô plan cop, moussur Falliéro veguet à lu qu'ô vio affas. Coum'ô v'éro brav' homme et ne vio point de fiéreta, ô faguet siettâ Picatau et risset de boun cœur quand ô li disset bounjour de la part dô méro de Sent-Barrancou. O fuguet si eimable et parlet si bounablament que Picatau venguet pus hardi. "Moussur Saliéro, disset-eü, vous sés dô païs de la grosso pruno et me, sai dô païs de la truffo. Nous soum préque vesis et nous siriam d'abord amis. Arcusas-me s'i ai trop de tupet, mas vourio bien vous damandâ quauquo ret. - Qu'ei aco, moun ami? - Eh bè, moussur lu President, peique vous sés lu meitre de la Franço et que v'as lu bras loung, vourias-vous seü plas me fâ vei quauquo plaço ? - Et parque voueis-tu no plaço? Ei co que tu ne gagnas pas ta vito? - Eh ! siei plo. Ovas, ca sirio malhurous s'i crevavo de fam, par l'amour que, sei m'avantâ, i ne sai point féniant. Soulament, vous sabez, moussur lu President, lous peisants enduren dô meichant temps et gagnen pas toujours bien gros, tandis que lous qu'an no plaço soun toujours à l'abri, bien benaiseis. Teuquen no bouno payo que ne brimo ni ne jalo. - Et quau plaço vourias-tu ? disset lu President. - Eh bè, moun Deü, Sous-Prefet ca me deipleirio point. - Ah! tu ne sés pas bilous! Tu ne sabeis pas que, par tenei quello plaço, fô vei de l'estruceü? - Mettam que n'en fô, moussur lu President, mas l'estruceü n'ei pas tout. Pardounas-me s'i parle trop, mas, dôs viageis, vous nounmas dôs Sous-Prefeis qu'an l'ar de meinageis. Ca ne marquo pas si bè que dôs gaillards dins moun janre qu'an de boun' eipanlas et un boun coffre. Couma lu nôtre, qu'ei no pito siquetto que ne tet pas sur sas chambas. Ca n'o ni forço ni santa, bouna gent. N'en secoudrio quatre couma se. Si quaucu lu menaçavo, ô se sôverio ô lio de se defendre. Eh bè, dins lous banqueis, sitôt qu'ô o begu chapino ô deiparlo.
"Auvo, moun ami, disset-eü à Picatau, tu parlas coum'un deputa et t'as l'ar d'un boun drôle. Soulament, ne coumpto pas qu'i te fase nounmâ Sous-Prefet. Zu t'ai deija dit, i me deidiset pas. - Tant piei, dit Picatau. Qu'ei bè lu coumpte dô ditoun : "Jamais, à d'un boun chi, ca li toumbo de bouns vos." Anfen, peiqu'i ne pode pas étre Sous-Prefet, me countentarai d'un' eitudo de cantounié. - Ah! par cantounié, reipoundet lu President, i ne dis et trop ret. Nous veiram co quand t'oras fai toun temps de sarvicet. - Bien vous remarciant, moussur lu gouvarnament, s'isset Picatau en parten. Anet, vous diset ô reveire et n'ôbludeis pas de dire bounjour par me à madamo la Republiquo." |
||||
| vers le début de la page | ||||
|