PEDOUEIROU PARMÉNO PICATAU
       La Marissou vio randu un grand sarvicet à Picatau chas lu commissari, mas la l'in randet n'autre que li faguet tant de plasei. Couma la sabio ente demouravo soun cousi, la lu menet jurquo davant sa porto.
       Pierre de Pedoueirou fuguet bien countent de veire Picatau. Sa fenno, la Brididi, lu reçobet pus frejament. Quello bougro éro cheno couma tout et la pensavo à la deipenso que Jean li ferio. Partant, la faguet soun poussible par li fâ bouno figuro, et mémo, sei que soun homme zu li coumande, la pourtet no bouteillo sur la tablo.
       Quand is aguéren bien trinqua et parla dô païs mai de toutas las couneissenças, is anéren se coueijâ et Picatau qu'éro gâte, durmit coum'un ro jurqu'à soulei leva.
        L'endemo, qu'éro un dimen. Couma Pierre ne trabaillavo pas, ô parmenet Picatau dins Paris. Touto la sento journado, lous dous cousis broueiteléren dedins la capitalo.
        Dins las rouas, y vio tant de navigaceü que la veillo.
       " Anfen, dit Picatau, ente van touto quello gent?
       - Sabe io, dit Pierre, Van et venen. Fan couma la couo dô chi. "
       Pedoueirou menet d'abord soun cousi près de la grando Lisouno que lous Parisiens pélen " La Seine ". Jean viset lountemps lous bateüs et lous grands pounts de peiro.
        Couma la cathédralo éro tout près, is la visitéren. Picatau la troubet bravo, si bè dedins que deforo. Ço qu'ô y troubet de pus quereü qu'éro lu tocho-chi (suisse). O lu prenio par un generau.
       Quand is ribéren à l' " Hôtel de Ville ", ô disset :
        " Eh bè, moun viei, veiqui n'hôtélo qu'ei loujable. Ca po n'y chabî dôs vouiajours! "
        Soun cousi li disset que qu'éro no mérario, mas ô lu creguet pas.
       Après, is piquéren pus loin. A la plaço de l' " Etoile ", Jean Faguet no remarquo :
       " Aqui qu'ei plasent, se dit, mas ca zu sirio mai s'is dôtavan quis grands pourtaus que soun lai ô mitan. Qu'ei plo n'anciéno granjo eibouliado ?
       - Que diseis-tu ? s'isset Pierre. Ca n'ei pas de pourtaus. Ca se pélo " Arc de triomphe ". Qu'ei Napoléon que z'o fai bâti. "
       Davant la Tour Eiffel, Picatau s'eiplamit.
       " Eh bè, moun viei, se dit, veiqui un brave landié! Dei la cimo n'un veü plo lu clouchié de Sent-Barrancou ? "
       Pierre de Pedoueirou faguet veire à Picatau bien d'autreis monuments, de bravas plaças, mai de la quitas garas.
       Sur lu cop de l'ensei, mountéren sur lu taratori    de " Montmartre ". Visitéren    l'eiglieijo dô " Sacré-Cœur " qu'ô dôs clouchiés si rounds que de las barjas de fet. Après, s'avancéren sur lu bord dô tuquet et veguéren tout Paris à lurs pieds.
       " Ah ! moun viei, dit Picatau, quau pilot de meijous ! Par moun armo, creset que Paris ei pus grand que tout'uno communo!
       - Tu voueis dire quatre communas, s'isset Pierre. Ah ! ma fet, n'un po dire que Paris ei grand et plasent. Qu'ei la pus bravo villo dô mounde.
       - Ne diset pas lu countrali, reipoundet Picatau. Paris o de grandas meijous et de braveis magasens, qu'ei n'affas entendu. Soulament, qu'ei lu païs dô brut et dô treblu, et fô y vei bounas chambas et bouno bourso. S'i me troumpe pas, la vito deü y être duro par lous paubreis.
       " Ah ! bè chas nous fai boun veüre ! Y o de boun ar et de la tranquillita. Lous passants y soun raleis et ne soun pas trop bien billas, mas ne fugen pas couma dôs fôs; is ne soun pas einarvas et toujours preissas. Is an de bounas figuras risentas et se réten no minuto par se dire bounjour et tirâ no couiounado. Auvo, ne vole point dire de mau dôs Parisiens ni de Paris. Si v'eimas votro villo, fô y rartâ, mas, par me, i diset :
       " Vivo Sent-Barrancou et vivo lu Perigord! "       (Avec la voix de Yvon Rouyer -Varaignes-)
vers le début de la page
Page d'accueil Glossaire
Table des histoires Histoire suivante