" Eh bè, s'isset-eü, peique qu'ei entau, vau lu charchâ tout sous. Lu troubarai bè, queraque : " Douas parsounas se rancountren miei que dous tarmeis. " Jean partit doun travars las rouas en visant lous passants. Et vous sés sûrs que n'y vio! O n'en croiset mai de millo et ca n'éro jamais lous mémos. " Que de gent! Que de gent! disset-eü. Ca deü plo être jour de feiro? " O viset tant de parsounas, lu paubre Picatau, qu'ô n'en éro eitourdi, mas jamais ô ne veguet soun cousi. " Et si li credavo ? penset-eü. Beleü qu'ô m'ôvirio. " O mettet doun sa mas en ôlietto countre sa gorjo, coum'ô fesio à Sent-Barrancou, et ô n'aguet douas bounas huchadas : " Aoh! Pierre. Aoh !... " La gent risséren. Soulament, Pierre de Pedoueirou ne reipoundet point. " O diable! dit Picatau. I ai prou pradela par eimati. Ore m'en vau cassâ la croûto. Beleü que moun cousi se troubaro tout sous. " O se siettet sur un banc dins t'uno grando plaço pleno de baboyas en peiro. La gent li disséren qu'ô v'éro dins lu " Jardin des Tuileries ". " Par moun armo, se dit, qu'ei un brave vargié! N'y vése pas un chô caput ni un quite pied de pourado, et n'y o pas de que nurrî un lapinou. Ah ! ca n'ei pas utile de l'entourâ de cliarvoirs ! Las troyas mai las poulas ne ruquen pas y fâ de mau. " Picatau ne viset pas lountemps ôtour de se. O se deipeichet de surtî lu po, lu sala et lous grillous qu'éran dins soun cabas. O minget de boun appétit et coualevet mai d'un cop sur soun gros nas la bouteillo de cinq chapinas. Quand ô s'aguet bien tundi lu panse, ô partit de nouveü par charchâ queü fameüs Pedoueirou. Après se vei eitotina un quart d'houro, ô sentit soun ventre que se deiboueiravo. Ca s'y eicrônavo couma de las galiôdas ô bord d'un reü. A parti de queü mament, ô ne charchet pus soun cousi, mas ô charchet un plai. A Sent-Barrancou lous plais ne manquen pas. Mas, dins Paris, ne soun pas bien eipeis. Picatau charchet partout. Charcho et charcharas-tu! Lu paubre chet ne troubet , pas de quite boueissou. D'abord, ô marchavo à boun pas, mas quante ca preisset prou, ô prenguet lu fugî. Fauto de plai, ô courguet s'acranâ ô found d'uno ruéto tranquillo. Soulament, par ne pas vei hounto, ô viset dô biai dô mur. Entau, ca n'éro pas sa figuro qu'ô fesio veire ôs passants... Pendent qu'ô s'eisinavo, un sarjant de ville passet. Après lu vei ensurta, ô li damandet sous papiés. " N'ai point de papié, dit Picatau. S'i vio soulament un pied d'arbo, m'en countenterio, mas, à Paris, ca n'y o de ret. " L'ajant, que n'éro point risou, parlet de l'emmenâ " ô poste ". Mas picatau se leisset pas fâ. Sitôt malina, ô passet un crocho-pied ô sarjant de villo, et, dins ret de temps, ô fuguet loin. |
||||
| vers le début de la page | ||||
|