LU SIGNAU D'ALARMO
         Lu tren que menavo Picatau à Paris se rétavo dins tous lous gros endreis. Chaque cop, y vio de la gent que mountavan, d'autreis que davalan. A d'uno garo, qu'entret dins lu coumpartiment dous galurauds que vian l'ar gazélas couma tout. Viséren Picatau et penséren qu'ô ne vio pas souvent vouiaja dins lu tren.
         Tout d'un cop, n'y o un que marmuset quauquo ret à l'oreillo de l'autre, en risen sous bourro. Après ô se levet, trapet lu signau d'alarmo et faguet semblant de lu tirâ tant qu'ô poudio. O gemet, ô s'eitoursignet, ô s'eicharnit, mas, queraque, ô vio lu tampourament feblet, par l'amour qu'ô disset à soun camarado :
         " Eh bè, moun viei, quello pougnado ei bien enracinado. N'y o pas mouyen de la deicranillâ. Partant, i ôrio bè vougu lous gagnâ, lous cent francs! "
         L'autre, un grand fedou que vio partant l'ar bounefant, se trapet, étou se, de tirgoussâ lu signau. O retenio sa let et venio rouge couma n'engravisso. Quand ô aguet bien tira de sa mo drecho, ô eissayet de la mo manço; après, ô y mettet las douas mas. Ah ! bah! ô ne pouguet pas miei russî que soun camarado.
         " O diable lu meitié! s'isset-eü. Queu macien ei trop nâtre. Par me, y renounciet. Lous gagne que vouro, lous cent francs! "
         Picatau vio tout vu et tout ôvi.       
         "De que s'agit co ? damandet-eü ôs dous garçous
         - Eh bè, disséren-t-is, qu'ei que nous vouriam fâ davalâ quello pougnado. Lu que russiro gagnaro cent francs.
         - Noum de noum! dit Picatau, fô qu'i eissayet. Sei m'avantâ, i ai toujours gu boun pougnet. Par moun armo, la pougnado segro, ô lu diable y sirio!"  
      (Avec la voix de Yvon Rouyer -Varaignes-)
         D'uno mo, ô trapet lu signau d'alarmo. Dô plan cop. ô lu faguet davalâ.
         " Lous moussurs, qu'ei de las moulettas! " disset-eü en risen, et ô damandet lous cent francs.
         " Ca vai venî n'empluya que vous payaro ", disset lu prumié garçou.
         A peno z'aguet eü dit que lu tren se rétet. Mous dous tridaus se deifiléren par mountâ dins t'un autre vagoun.
         " S'en van par l'amour qu'is an vounto ", disset Jean Picatau.
         A queü mament, ca mountet n'empluya.
         " Luqua v'ei co, se dit, qu'o tira lu signau ?
          - Qu'ei me, dit Picatau, et ret que d'uno mo. N'ei co pas qu'i sai bounefant ?
         - Et parque l'as-vous tira?
         - Qu'éro par gagnâ cent francs, pardi. Vous poudez lous baillâ sei lous me rencurâ. M'en dote qu'i lous meritet. "
         Picatau cresio vei de l'argent mai dôs coumpliments. O n'aguet ni un ni l'autre, lu paubre chet. L'empluya lu viset couma s'ô li vio vendu de las moungetas que ne voulen pas cueire. D'un ar que n'éro point risou, ô s'eimaget de soun noum mai de sa demouranço. Orias dit un gendarmo que fai un proucès à quauque bracounié.
         " Vous sôbreis ço que ca vous coûtaro! disset-eü à Picatau.
         Jean coumprenguet qu'ô vio eita roula. O prenguet soun cabas et charchet partout lous dous cheiteüs que lu vian affina. O voulio asoulament lur foutei soun poing sur la figuro. Mas ô ne pouguet pas lous troubâ. Couma lu tren tournavo partî, ô mountet ô pus près, dins t'un vagoun de prumiéro classo.
vers le début de la page
Page d'accueil Glossaire
Table des histoires Histoire suivante