| Lu
tren éro deija en gara et navo tôt partî. Mas Picatau ne sabio ente mountâ.
Qu'éro partout plet de gent qu'ô ne couneissio pas. Forço charchâ, ô troubet
tout parié no plaça que li counvenio : ô se cougnet dins t'un vagoun de
marchandias qu'éro garni de fûts de vi. Quello coumpagno li plasio. Après
vei fai tountounâ las barriquas par veire si l'éran plenas, ô se siettet
sur un pitit barreü. Mas ô n'y rartet pas lountemps. Un empluya lu faguet
davalâ et lu menet dins t'un coumpartiment de troisiémo ent'y vio deija
sept huet vouiajours. Bientôt, lu cheffet de garo faguet eicouéla sa pito chabretto. Lu tren eitiflet, eipouffidet et partit en bradassant. " Eh! pitit, de vai co vite! dit Picatau. Si n'am lu malur que qu'eivarse, nous vam nous eifrômî! L'âne de notre méro marcho bien, mas qu'ei un bouri à coûta dô tren. " Quante Jean aguet prou visa lous aubreis que fugian et las meijous que vian l'ar de dansâ la bourréio, ô se viret dô biai de sous vesis et se trapet à blagassâ. Ca l'eitounet que degu lu couneisset. Par que tout lu mounde siet ransegna, ô disset feü par gulio ent'ô demouravo et coum'ô se pelavo, ô parlet de la communo de Sent-Barrancou, de la sechiéro et dô cours dôs beitiaus. Après, ô countet de las viorlas en risen à pleno gorjo. Si Picatau risio coum'un Ameriquen, en fasen veire sas grandas dents, ô parlavo avéque las mas, couma lous Marseillés. Tout en farlassant, ô s'eibrassiavo tant qu'ô faguet toumbâ lu chapeü de soun vesi mai las lunettas d'uno dama qu'éro près de se. Mas touto chauso o no fi. Quand ô ne sôguet pus que dire ô poset sa chiquo. Qu'ei vrai que y vio quauquo ret que coumençavo l'einouyâ. Tout d'un cop, ô disset : " Ca me taino que lu tren se réte. " Pau de temps après, ô ajoutet : " Eh! s'i éro près d'un mur! " Quante ca lu trabaillet prou, ô aguet pô de ne pas pechei se retenei. O zu disset à soun vesi. Quel homme lu menet dins t'uno pito bioto qu'éro soi-disant esprès par co. O mitan y vio n'espéço de grando soupiéro trôcado. Picatau penset que n'un l'y vio pas mettudo par trempâ la soupo. O n'ôsavo pas s'en sarvî, mas ô y fuguet bè fourça, lu paubre bougre. " Lu besoin fai fâ ", couma dit lu provarbe. Quand ô tournet dins soun coumpartiment et qu'ô se siettet près de la damo, la se culet de pô qu'ô torne s'eibrassiâ. La ne vio pas envio de trapâ n'autro mourniflo. Mas vous vas veire que la ne fuguet pas miei ô loin qu'ôprès. Tout d'un cop, la fuguet beneisido par n'espèço d'aigo rousso que toumbavo dô porto-bagage et venio dô cabas de Jean. Ca chôliet soun chapeü mai sa raubo et la disset en marounant : " Lous qu'emporten dô vi en vouiage ferian bien de lu miei bouchâ. " Picatau viset dins soun cabas. La bouteillo de cinq chapinas éro toujours pleno et la panouillo affiblavo bien.
|
||||
| vers le début de la page | ||||
|