Dei par Nadau, lu pitit Picatau s'eimajavo dô Mardi-Gras et, tous lous jours, ô damandavo : " Ai mai, ei co tôt Carnavar? "
     A la fi, tout parié, quello grando féto ribet.
     Notre gourmand ne migret point de fâ " Os marquaras " avéque lous autreis drôleis. O lio de se deiguisâ, ô eimavo miei toupinâ. Couma sa mai via beücop de tra- bai, ô li eidet fâ la cousino (un cop n'ei pas coutumo). O pourtet lu bouei, abrandet lu fio, eipoutit las prunas par fâ no tartro, et, de temps en temps, par se mettre en appétit, ô deibrechavo las marmitas et sinavo lu fricot.
     Quell'annado, lous Picataus ne chatéren pas de buli. Coum'is vian toua lu porc, ne manquavan pas de vitoiro. Vian de bouno soupo negro, un gros farci, un tros de rôti et un chapelet de boudins, sei coumptâ la tartro, lous bigneis et lu cafet.
     Quand fouguet dînâ, lu prumié sietta ca fuguet lu pitit Jean. O se trapet de minjâ coum'un chat magre.
     En coumençant, tout anet bien. Lu farci et lu rôti foundian dins sa gorjo couma lu bouei dedins lu four et sous boutous de malinas pettavan un après l'autre. Avéque lous boudins, ô n'aguet pas tant de chanço. Lous treis prumiés filéren couma de l'anguilas, mas lu quatrième, qu'ô avalavo tout entié, se viret de travars dins lu found dô gourjareü. En soun det, ô lu pousset. Ah bah! ô aguet beü gouzounâ, empoussible de lu fâ coulâ.
     De quel affas, lu paubre Jean ne poudio pus lenâ. Mémo ô coumençavo venî blu.
     N'un dit que y o un Boun Deü par lous sadoulards. Fô creire que n'y o n'autre par lous gourmands. Jurtament, dins queü mament, moussur Brindoueirou, lu medeci de St-Crampâci, se troubet de passâ dins la routo.
     "Moussur lu Medeci ! credet la Picataudo, venez vite, seü plas ! Notre drôle s'eitranlio!"
     Brindoueirou entret cop set. O eissayet de rachâ la tripo. Jamais ô ne pouguet russî.
     " Chanjam de plan, s'isset-eü. Peique lu boudin ne vô pas surtî, vau lu cougnâ dedins. Fenno, passas-me lu boueirou de las pous. "
     Sitôt qu'ô l'aguet, ô se trapet de pigougnâ dins lu gourjareü de Jean. Mas qu'éro taloment plet par darei lu boudin, qu'ô ne pouguet pas l' enfounçâ.
     Bounur par lu gouiat que la Madeli venguet. Pus fino que lu medeci, la chôchet d'un cop set sur l'embouni dô malaude. Ca faguet ressort, moun ami, et ca se deibacounet. Coum'un boulet de canou, lu boudin voulet sur lu nas de Brindoueirou. Bien entendu, ô n'aguet pas de mau (un boudin qu'ei si mouflet !). Si ca vio eita lu boueirou, ca li rachavo lous ueis.
     "Marci, ma paubro Madeli ", disset Picatau quand ô pouguet parlâ. Après, ô paret ô medeci un cop d'uei mau jôvent.
     " Tant qu'à vous, s'isset-eü, vous fau pas de coumpliments.
     - Ni me, se dit la Madeli. Sento Viarjo! Vous n'en as dô tupet de soignâ lous malaudeis en d'un boueirou... "
     Moussur Brindoueirou se troubet si couioun, que, sur lu cop, ô ne badet pas lu bet. Quand ô reprenguet sous sangs, ô disset ô pai dô drôle: " Vous me devez dix francs." (Dins queü temps las counsurtas n'éran pas si charas qu'ô jour d'ahuei.)

" Diès francs! dit lu Béca, tout eibuffa. Diès francs! par lu trabai que v'avez fai? Par moun armo, que ca n'ei bien jura, vous n'ôreis pas un eicrupit!       - Me, s'isset la Mariéto en rachanant, sirai pus generouso : li baille lu boueirou. L'o-t-eü pas bien mérita? M'ei d'eivis qu'ô so bien s'en sarvî..."      (Avec la voix de Guy Granet)

     Moussur Brindoueirou viset de bingouei l'homme eimali mai la fenno moucandiéro.
     " N'y o ret à fâ avéque quis aseraus ", penset-eü, et, couma lu chi dôs Picataus ranavo darei sous talous, ô ne groumet pas dins la meijou. O passet defore sei ret dire.
     " Hé! moussur Brindoueirou! credet la Mariéto en rîsen, v'ôbludas votre boueirou. O vous faro fauta par soignâ d'autreis malaudeis. "
     Mas lu medeci ne viret quitament pas la této. O se deifilet couma la lébre quand lous chis la séguen.
     Tant qu'ô drôle, ô ne pardet pas courage. O se viret dô biai de sa mai et de la vieillo Madeli que coumençavan de platussâ.
     " Fennas, se dit, qu'ei pas lu tout de farlassâ. Et la tartro, ent'ei-t-ello ? "