| La
Picataudo via no poulo que couavo. Queü trabai n'ei gaire peniblet, mas
ô n'ei pas bien amusant. Couma qu'éro no jôno poulo, la n'aguet pas la pacienço
de groumâ treis senmanas dessur lu palissou. O bout de quinze jours, la
n'aguet larjament soun aise. Quello couquino se poutignet et l'abandounet
lu nid. La Mariéto Picatau ne voulio point minjâ dôs iôs à meita couas. Que n'en fâ ? Lous jiettâ ? Ca li fesio degreü de foutei lai soun revengu. " Ah! ma fet, disset-ello, vau nâ lous vendre à Nountroun. L'einouious, qu'ei qu'is granolien. Qu'ei tout jurte si n'un n'auvo pas pianlettâ lous poulichous, mas qu'ei be lu diable s'i ne trobe pas un coucassié ô quauquo damo que lous massaro. " La se troumpavo, la Picataudo. L'aguet beü soutenei que sous iôs éran freicheis, degu lous li vouguet. Veiqui no fenno en peno de sa marchandio. " Sabe ço qu'i vau fâ, penset-ello. La brido de ma sucho n'ei pas trop salido. La ruquo cassâ en routo. O lio de m'entournâ à pied, vau prenei lu courrié. Entau, ne sirai pas si gâto. Quand i davalarai, dirai ô coundutour qu'i n'ai pas lu boutou. Countent ô pas countent, fouro bè qu'ô préne mous iôs en payament. " " Hé! Manuguet, disset-ello ô courrié, as-vous no plaça par me dins votre vaturo ? - Eh plo! Eh plo! ma bravo fenno. En se caillant, tout lu mounde chabiro. " La Picataudo ne penset point dire couma la coumptavo payâ. La mountet et s'enjuquet couma la pouguet, uno jarro sur lu siéti et l'autro sur lous janoueis dô curet de Marei. La n'aguet pas de chanço, la Mariéto. Quante la davalet, la coulet sur lu marcho-pied et s'eiparet dedins la gaulio. Bien entendu, sous iôs se casséren. Couma fâ par payâ, après quel acident ? En attenden soun tour, la se tiret à part et la viset fâ lous autreis. Lu prumié que payet, qu'éro un grand flémant que tenio soun gouiat par la mo. - Cambe devet io ? se disset-eü. - Qu'ei quarante sôs, moun ami. - Et par moun fils? - Par votre fils, qu'ei lu mémo prix. - Anet, Manuguet, rasounas-vous. Lu drôle ô d'enquéro lous pantalous courts. Fô pas qu'ô payet tant qu'uno grando parsouno. " Manuguet éro n'homme coulant. " Eh bè, se dit, mettam vingt sôs par lu meinage. - Mai m'étou, vole payâ que meita prix, s'isset la fillo de la Louiso, uno grosso buro que vio plo lous ueis prints. - Et parque doun ? dit Manuguet. - Parqu'i ai lous pantalous si courts que lu gouiat, mai beleü mai. " Lu courrié n'ôset pas levâ lous coutillous de la fillo par veire si la disio la verita. O n'éro pas trop countent, mas ô ne chicanet point -ô v'éro si brave homme- et ô prenguet lous vingt sôs sei marounâ. Dins queü mament, ô vai veire la Picataudo que se sôvavo sei ret dire. " Hé! vieillo, s'isset-eü, fô payâ vant de partî. - Arcusas, disset-ello , vous devet ret. - Eh bè, vous n'en as dô tupet ! Cresez-vous qu'i fau menâ la gent " gratis ", couma disen lous Parisiens?
Manuguet ne sôguet que dire. O se countentet de badâ lu bet. Tant qu'ô charchavo sa reipounso, la Picataudo se deifilet, coum'un chi qu'emporto un plumai |
||||
| vers le début de la page | ||||
|