| Sur
le cop dô marende, Picatau entret chas Rabi, lu marchand de vi. " Parei que v'as de boun vi, diset-eü. Pourrias-vous m'en fâ goûta? - Bien entendu, moun ami. Vesam veire, quau janre de vi voulez-vous? Et d'abord, quau prix voulez-vous mettre? - Vole pas mettre de prix, dit Picatau. N'ai pas lu boutou. - Veset que v'eimas rire, dit lu marchand. Eh bè, veiqui ço que fô fâ. Vous goûtareis plusieurs espéças de vi. Après, vous chôsireis lu que vous pleiro lu miei. - Votr' idéio ei bouno, moussur Rabi. Ah! dijas-doun, si ca vous deirenjo pas, pourrias-vous seü plas me baillâ n'eichalou de po avéque dous treis cacaus ? Ca fai troublâ lu vi pus sabourous. - Avéque plasei, se dit Rabi, et ô paret lu chanteü à soun cliant. " Picatau coupet un trignau de po que pesavo beleü no leüro et prenguet no pougnado de cacaus. Par coumençâ, lu marchand emplit soun goubelet d'un vi eipeis que vio goût de iôs couas. Picatau lu troubet pas à sa modo. Après, ô l'in baillet n'autr' espéço. Queü qui ne vio pas de poutraiso, mas l'aigo li manquavo pas. Sa grando qualita, qu'ei qu'ô ne ruquavo pas grisâ. O n'ôrio pas fai de mau à d'un meinage. Quante Jean Picatau l'aguet goûta, ô mettet lu veire près de soun oreillo. " Que fas-vous ? s'isset l'autre. Voulez-vous beüre par l'oreillo ? - Nou, qu'ei qu'i eicoute ço que lu vi me dit. - Et que dit-eü? - Chou! ne fasez pas de brut. Lu vi ei si feblet qu'ô n'o pas la forço de credâ. O me dit que votre pou v'o gagna mai de cent millo francs. - O n'o menti, disset Rabi. Ovas, si lu vi n'ei pas fort, n'en sai pas causo, qu'ei la fauto de la vigno. Anet, veset que v'eimas lu vi qu'o dô degret. Vau troubâ ço que vous fô. " Queü viage lu marchand presentet à soun cliant dô vi de Béziers, dô Bourdeü, mai un eimable vi de Brantôme, que n'éro pas si fort que lous autreis, mas ô vio goût de nôsillo et ô v'éro si cliar que dôs ueis de fillo. Tout en cassant la croûto, Picatau ticliet un veire de las treis espéças et troubet dôs defauts à chaque vi. Iun éro trop mô, l'autre en pau jabre. Lu darnié li ôrio plagu. Soulament, ô ne vio pas prou de coulour. " Sai bien fat, penset Rabi, d'offrî à queü peitôt ço qu'i ai de pus fi. Deürio sabei que ne fô pas baillâ de miau ôs pousseitrouns. Queü galuraud ne counei pas ço qu'ei boun. Vau li dounâ racliobudeüs, ca faro miei soun affas. " En mémo temps, ô garnit lu goubelet de Picatau avéque dô noah que fesio quinze degreis et que sentio ô renard. " Et queü qui, vous counvet-eü? disset-eü à soun cliant. - Heu! ce dit l'autre, l'ai begu en pau vite. M'ai pas bien randu coumpte. Baillas m'en n'autro goutticho, si sa veinoyo pas. ", Rabi n'éro pas chi. O l'in boujet no si grosso goutto que lu veire n'en sabroundavo. Picatau, que vio chaba soun tros de po et sous cacaus, masset quell' eilampiado sei lenâ. " Eh! pitit, lu rude vi! s'isset-eü en passant sa mo sur sas bouchas. Qu'ei lu meliour de tous. " Et, couma ca li eichôravo lu panse, ô se trapet de chantâ: L'autre mati, me permenavo Tout lou loung de... Turlututu! " Siau! siau! disset Rabi. N'am un pitit drôle que deurt. Eh bè! peique lu vi vous plas, dijas-me cambe vous n'en fô. N'en voulez-vous no demio ô b'étou no barriquo ?
Picatau penset que qu'éro temps de partî. O disset vite bounsei et se foutet lu camp. " Boun marende, moun ami, diset-eü en s'en anant, boun marende bien rousa et pas trop char..." |
||||
| vers le début de la page | ||||
|