Par Nadau baptiséren Picatau.
     La Madeli fuguet patrouno couma la vio fai la fenno-sajo quand lu drôle naquet. Mas la n'aguet pas besoin de lu pourtâ. O v'éro si rudet qu'ô marchavo tout sous. Par davalâ dins lu bourg ô eipingavo coum'un lebraut. D'en pau de mai qu'ei se qu'ôrio pourta la patrouno.
     Quand is ribéren davant l'eiglieijo, lu meinage se rebiffet.
     " Par moun armo, s'isset-eü, vole pas me cougnâ dins quello granjo ! Ca y fai si bru que chas lu loup! "
     Ne cujéren pas l'y fâ entrâ.
     Quand lu goujat fuguet davant lu beneitïé, ô s'eiplamit.
     " Eh! la bravo pilo ! s'isset-eü De sirio-t-ello coumodo par fâ beüre notre âne!
     - Ca n'ei pas de pilo, pitit fat, disset la patrouno. Qu'ei no fount beneitiéro, par baptisâ lous pitits.
     - Ah! qu'ei no fount ? Eh bè, que ne siet co. Tout ôre n'ai pas set. "
     Lu curet de St-Barrancou n'éro pas eisagne. Quand ô baptiset lu pitit Jean, ô li rencuret pas l'aigo beneito. O n'en faguet pissâ jurquo dins soun cagouei. Lu drôle n'en foutet n'eicouélado couma s'is voulian l'eiviroulâ et ô se faguet lâcha. Après, ô fugit en eivarsant quôquas chieiras.
     Lu troubéren attapa dins lu confesseünau. O n'ôrio point surti s'is li vian pas proumei de la tartro mais dôs bigneis.
     Quand ô fuguet apasima, lu peiri menet la mini sous la cordo de la cliocho et li faguet ami parque lur filiô ne siet pas gourmous. Couma qu'éro no crâno fillo, ô se countentet pas de l'embrassâ un cop sur chaque jauto. O requillet; creset mêmo qu'ô la chatinliet.
     Lu curet troubavo qu'ô fesio trop durâ lu plasei. O voulio li damandâ s'ô ne vio pas tôt chaba, mas dins queü mament, Picatau lu tirgousset par sa raubo.