NEISSENÇO DE PICATAU

     Par delai lu Diable vart, ô mitan dôs eissarts, y o no pito communo qu'is pélen St-Barrancou-sur-Lisouno.
     L'ei pleno de bravas founts que ne cragnen pas la sechiéro, mas, quoique lur aigo siet freicho et sabourouso, la gent n'en beven pas souvent. Par que lous peissous ne crevan pas de set, la laissen pissâ dins las rigolas jurqu'à la Lisouno. Quand is soun assedras, is aimen miei ticliâ lu boun vi de lurs vignas.
     St-Barrancou ei lu païs de l'engravissas et dôs sinliés. Lous drôleis y soun eibôdis. A dous ans se malinen tout sous. Las fillas, tout plet mignardas, couneissen lu calandrié sur lu bout dô det. Ossi n'y o gaire que fan passâ Pâqueis avant Rampan.
     Et lous vieis, fô veire s'is soun eicarabillas ! Coum'is ne counsurten jamais lous medecis, ne cujen pas murî. Quoique lu sementéri siet à l'abri dô rojo-pau et qu'ô ayet no bravo vudo sur lu bourg, ne soun pas preissas d'y nâ durmî.

     Fai si boun veüre à St-Barrancou! Qu'ei lu rei dôs endreis. Mas, de tous sous meriteis, veiqui lu prencipau: qu'ei dins quello communo bien tranquillo que Jean Picatau naquet un beü mati dô meis de mai, que lu temps éro cliar coum'uno parlo et que lu marle eitiflavo dins lous plais.       (avec la voix d' Yvon Rouyer -Varaignes-)
     La mai dô drôle se pelavo Mariéto et lu pai éro baptisa Pitit-Jean, mas, coum'ô vio la figuro pleno de pitits cros, la gent lu pelavan "Lu Béca". Un jour qu'ô vio passablament begu, ô me countet, feü par gulio, tout ço que se passet quante soun fils naquet.
     O me disset qu'à sa neissenço, Jean Picatau éro coueiffa. Li manquavo pas un piau et pas no dent. De mai, ô parlavo couma pai et mai. Vous diset, qu'éro no vré mirôdio.
     La Madeli, que vio sarvi de fenno-sajo, ne vio pus vu n'affas parié et ne sabio que dire. Partant, d'habitudo, vous proumetet que la vio bouno platino.
     Tant qu'à la mai de queü rudet gitou, la n'y coumprenio ret. La visavo lu meinage sei sicâ et ne boujavo pas mai qu'uno baboyo. L'éro eibabiado couma no poulo qu'o fai eisî un canard.
     Lu Béca voulio frettâ las bouchas de soun fils avéque no liço, couma, dins l'ancien temps, vian fai ô rei Henri. Mas ô n'aguet pas meitié de se deirenjâ. En guiso de s'eicouélâ couma lous autreis drolichous, lu pitit, que vio pas lu lignô, credet sitôt nacu : "Créve de fam, noum de sor ! baillas-me no liço qu'i fase no fretisso!"
     Après no pit'houro, parei qu'ô tournet pianlettâ. Quete cop, pourtéren ô gouiassou no soupo si eipesso. que dô mourtié, de quellas soupas de sejaire que lu culié s'y tet d'en pé. D'après ço que mo dit lu pai, lu drôle n'en masset no siéto pounchudo.
     Mas quand ô disset : "Oro vau fâ un boun chabrô ", lu Béca, que risio sous bourro, ne pouguet s'empeichâ de dire: " Moun viei, lu gouiat o bouno pouncho. Sai countent, par moun armo! Jamais parié ôchou n'o eîsi dins St-Barrancou."

vers le début de la page
Page d'accueil Glossaire
Table des histoires Histoire suivante